Prinse 2012 JP Justin 1 oetgeroope as jeugprins ZDH Tjeerd 1 geit de Veldjmuus veur. Zaoterdaag 7 jannewarie jl. waerde de prinse van De Veldjmuus oetgeroope. In ein totaal oetverkoch Moezepelies waerde jeugprins Justin as eerste oetgeroope door vors Jannie Fermont geassisteerd door grootvors Dré Peters. Zien mótto is 'As motormoes veul ich mich thoes'. Mit deze sjpreuk wilt hae ziene grootste hobby promote. Justin Aspers koos Henny Schmitz as ziene adjudant. Later op de aovond waerde Tjeerd de èèrste oetgeroope door vors Evert Smeets geassisteerd door grootvorst Dré Peters, as veurgènger van VV de Veldjmuus. Eine lange gekoesterde druim kwaam eindelik in vervulling. Ònger ut motto 'Neet de kwas oethange' zal de 43 jäörige sjilder de Veldjmuus veurgaon. Zien adjudante zeen aadprins Frans Simons en aad jeugprins Davy Tobben. Tjeerd Balendonck dae biej De Veldjmuus naeve raod van ellef lid auch al driej keer adjudant van eine Veldjmoesprins is gewaes, waas auch al ins in 2000 wienboer. Tjeerd is getrouwd mit moezemaedje en besjtuurslid van De Veldjmuus Marion Tobben. Tjeerd en Marion höbbe twee dochters Djamilla en Chyenne diej alletwee aktief zeen in de dansgarde van De Veldjmuus.

Wienkeuningin 2011 'Alles kump good' Sandra Schoemacher 29ste Wienkeuningin van De Veldjmuus Remunj. De 41-jäörige Sandra Schoemacher is aafgeloupe zaoterdaag 1 oktober in het Moezepelies oetgeroope toet 29ste wienkeuningin van vastelaovesvereniging De Veldjmuus. Sandra is hoesvrouw en mooder van de aad-jeugprins Gillian, dae de jeug van De Veldjmuus in 2009 leidde. Sandra koos as secondante veur de 34-jäörige Patricia Erdkamp-Schaefer. Secondante Patricia haet twee kienjer, Kaily en Joey en is kapster van beroep. Veurdet De Veldjmuus häör nuuje wienkeuningin oetreepe, waerde eers aafsjied genaome van de wienkeuningin 2010 Carola Beeren en häör secondante Kimberley de Winter, die De Veldjmuus ein jaor langk op ein zeer enthousiaste meneer zeen veurgegaon. Carola en Kimberley kinne terögkieke op ein jaor vol sjoon momente en hoogtepunte. Róndj de klok van 22 oer reep grootvors Dré Peters geassisteert door locoburgervader Jos van Rey en wethaajer Raja Moussaoui de nuuje wienkeuningin oet. Wienkeuningin Sandra haet as motto gekaoze 'alles kump good', waomit ziej häör positieve insjtelling euver alles waat gebeurt óngersjtreept. De kómmende waeke gebroeke De Veldjmuus as warming-up veur de vastelaovend. Elke zaoterdaag is d'er in het Moezepelies eine balaovond mit topmuzikante. De entree is zowiej geweunlik gratis. Veur meer informasiej kint geer kieke oppe saijt van De Veldjmuus of volg de publicaties. Alle evenemente waere gehaaje in het Moezepelies aan de Prins Bernhardsjtraot te Remunj.