De tied vluug veurbiej, veur détse ut in de gaate höbs ligk dao alweer ein jaor achter dich.
Ich zoot ein van dees daag ins effe get veur mich oet te sjtaare toen ich mich bedach, dét veer al héél gét jäörkes achter ós höbbe ligke.
Achtereuver geleunt oppe bank, zoog ich ut jaortal 1937 veurbiej vleege.
Krejuu dach ich, dét zeen 75 jaor geleeje, toen waerde veer és vastelaovesklup opgerich.
Bedingkend leunde ich nog gét meer achtereuver (in de tösse tied mien traessers oet gedaon en mien óngerste fraanjulle oppe taofel gelag) en zoog alweer eine haup veurbiej sjeete waat ós klup neet allemaol haet mótte doorsjtaon.
De 2e Waereldoorlog, veer hadde toen nog gein prinse oppe plank gebrach, maar miense waat mot dét ein geveul zeen gewaes, in plaats van ein confetti kenon, klonk ut geknal ein bietje angers.
1953 de Watersnood, ut jaor det geine vastelaovend waerde gevierd, ut beer waat dich normaal toet aan de kin sjteit waas toen water gewaore.
De prins kreeg gelökkig veur hém, de kans omdét in 1954 good te maake, ut zól dich mer gebeure!
1990 de Golfoorlog, de optoch waerde oetgesjteld nao hallefvaste toe, ein besjloet van óze minister president, dae veulde de zandj van de sahara in de nek, mér neet dae van de Limburgse heuvele.
Dit zeen ein paar sjwaor jaore ésse dét bekieks, mer dao taegeneuver, kinse diej waal weg sjtreepe taege alle anger prachtige jaore diej waat veer höbbe aafgeturruf in ós verleeje.
Daage vleege veurbiej, Jaore vleege veurbiej, zellefs väöl luuj diej dit laeze, höbbe ein eeuwwisseling mit gemaak.
Muzikaal gezeen is dao auch ein versjuuving gewaes door de jaore haer.
In de jaore ’30 toet en mit de jaore ’60, kreegs doe in Remunj (jaor in, jaor oet, oehoe oehoe, om gek van te waere) allein mer meziek van platte Remunjse taal veur dien ténj gegooit.
In de jaore ’70 en ’80 allemaol van diej Hollénjers diej dich diene bölles gek maakte.
Ich weit nog, „Als ’t gras twee kontjes hoog is“ of „Heb je ’t kontje van Marieke gezien“, miensekienjer waat eine ónzin, gelökkig zeen diej Hollénjers dao noe auch ein bietje achter, dét vastelaovend viere, meer is es allein mer „Vötje Veule“. (GLUIF ICH DET?)
Noe anno 21e eeuw, kinne veer zégke dét de meziek get baeter in mekaar is gesjtaoke, vanaaf de jaore ’90 waerde d'r väöl Limburgse meziek gemaak, (ein revolusiej waat noe auch ut kreumpe is) WÓ BLIEVE DIEJ NUUJE?
Jao, doe kins zégke waatse wils, vastelaovend bringk meer in eine miens los dan väöl luuj dingke, veural esse dao van dichbiej in waers betrókke.
Mer laote veer ins in de toekóms kieke, gelökkig kinne veer det neet, angers zólle d'r mesjien waal gekke dinger gaon gebeure.
Ut einige waat ich uch kin vertelle euver de toekóms, is dét veer op zaoterdig 7 jannewarie 2012 ós nuuj prinse gaon oetroope, en dao haopelik weer ein sjoon sezoen mit mooge gaon belaeve, wó ich eigellik neet aan twiefel.
Och jao, ich kin uch nog gét vertelle euver de toekóms (waas ich bienao vergaete) Kersmis viltj de aankómmede jaore op 25 en 26 December.
Veuroetzichte höbbe veer waal, nog 2 jaor dan sjtaon veer alweer veur ós jubilejumjaor 7 x 11, en ich bedingk mich net, ut waert langkzaam tied dét veer dao aan gaon dingke en wirreke.
Ut is nog eine lange waeg mer doe kins baeter biejtieds oppe sjtasie sjtaon, angers vertrék de trein zónger dich.

Ich wins ut uch nóg, de böl en toet op ein van ós sjoon aovende, kiek in óze agenda veur ut pegram.
Op nao de 77 (7X11) jaor

Vors Evert